Seiteninhalt

SIG

Sistem d'infurmaziun geografica (SIG)

Tge è in sistem d'infurmaziun geografica?

In sistem d'infurmaziun geografica (SIG) è in instrument da l'informatica che ha l'intent da preschentar e d'analisar chaussas ch'existan resp. che capitan sin il mund e che han in connex cun il territori. La tecnologia dal SIG cuntegna operaziuns da bancas da datas, sco consultaziuns u analisas statisticas, e pussibiliteschan da far analisas geograficas e da preschentar quellas en furma da chartas geograficas. Questas pussaivladads distinguan il sistem d'infurmaziun geografica d'auters sistems d'infurmaziun. Uschia è il SIG in instrument prezius per declerar eveniments, per scuvrir tendenzas, per far planisaziuns strategicas e.u.v.

 

Tgeninas èn las caracteristicas spezialas d'in sistem d'infurmaziun geografica?

Las infurmaziuns geograficas u territorialas sa basan sin in sistem da referenza territorial communabel (sistem da projecziun resp. da coordinatas). Questa basa communabla permetta da metter en relaziun ina cun l'autra tut las infurmaziuns registradas, e quai independentamain ina da l'autra. Il sistem da referenza è per uschè dir l'element da colliaziun communabel, la clav. Questa via eleganta da pudair metter en relaziun infurmaziuns independentas tras in sistem da referenza territorial communabel chaschuna dentant intgins problems en la pratica. Per l'ina existan sin l'entir mund differents sistems da projecziun e da coordinatas che ston vegnir accordads da temp en temp pervia da las metodas da mesiraziun adina pli exactas e pervia dals process tectonics. Per l'autra chaschuna la registraziun territoriala d'objects custs considerabels, ed i dat pliras funtaunas da sbagls pussaivlas. Per che las relaziuns territorialas en il sistem d'infurmaziun possian vegnir reproducidas en ina furma uschè vardaivla e reala sco pussaivel, ston – tar la constituziun d'in SIG – quests problems vegnir resguardads suffizientamain, fixond normas adattadas.   La furma dals singuls objects po vegnir represchentada – tut tenor basegn – cun in punct, cun ina lingia u cun ina surfatscha. Ils objects pon pia vegnir preschentads en moda geometrica. La communicaziun visuala è la furma la pli potenta per transmetter e per analisar infurmaziuns. Perquai è la transposiziun e l'interpretaziun visuala da quantitads da datas u da geometrias cumplexas la meglra metoda per chapir connexs globals.   Al sistem tecnic che vegn duvrà per elavurar las datas territorialas vegnan dentant fatgas pretensiuns considerablas. La preschentaziun da las infurmaziuns territorialas sin chartas u sin products sumegliants a chartas – saja quai sin palpiri, al monitur u sin ina taila da projecziun – sto satisfar a las grondas pretensiuns qualitativas (colurs, dissoluziun, precisiun geometrica, sveltezza, simbolica e.u.v.) da las «lecturas» e dals «lecturs».   L'elavuraziun geometrica da las datas territorialas (calculaziun da tagls, vischinanzas, rotaziun, transfurmaziun da vecturs en retagls e viceversa e.u.v.) premetta algoritmus spezials. Quests algoritmus ston esser corrects, fidads ed effizients, ston ademplir la precisiun da calculaziun che vegn pretendida, ston minimalisar multiplicaziuns da sbagls, ston esser robusts visavi inconstanzas logicas1 che vegnan chaschunadas da pitschens sbagls numerics e duain dumagnar tut las constellaziuns territorialas ed ina quantitad da datas illimitada.   Questas qualitads spezialas dals sistems d'infurmaziun geografica èn stadas il motiv ch'ellas n'han fin ussa betg pudì vegnir schliadas cun tecnologias da standard.   La software che vegn duvrada en sistems d'infurmaziun geografica na vegn betg mo applitgada per sistems d'infurmaziun sco quels qua survart, mabain po er vegnir utilisada per analisar datas territorialas sco er p.ex. per programs da statistica. Ils cunfins tranter quests dus champs d'applicaziun n'èn betg fixs. Tranter l'organisaziun, ils models da datas ed er l'infrastructura datti pia differenzas.

 

Tge datas èn avant maun en il sistem d'infurmaziun geografica da l'administraziun chantunala dal Grischun?

Il sistem d'infurmaziun geografica da l'administraziun chantunala dal Grischun cuntegna geodatas che gidan ad ademplir incumbensas chantunalas, sco p.ex. datas davart la selvicultura, davart la protecziun da la natira e da la cuntrada, davart la planisaziun dal territori, davart la protecziun da l'ambient, davart la mesiraziun uffiziala e.u.v.

 

Nua sa chatta il sistem d'infurmaziun geografica da l'administraziun chantunala dal Grischun?

L'infrastructura dal sistem d'infurmaziun geografica dal Grischun vegn manada dal center da cumpetenza dal SIG, il qual è ina partiziun da l'uffizi d'agricultura e da geoinfurmaziun e furnescha en emprima lingia servetschs a l'intern da l'administraziun.